ఫ్రాన్స్‌లోని స్ట్రాస్‌బర్గ్‌లో ఉన్న యూరోపియన్ పార్లమెంట్ భవనంలో అమెరికా అధ్యక్షుడు డొనాల్డ్ ట్రంప్ నగ్న విగ్రహం ఏర్పాటు కావడం చర్చనీయాంశంగా మారింది. ‘ది ఆరెంజ్ ప్లేగ్’ అనే పేరుతో ఏర్పాటు చేసిన ఈ విగ్రహాన్ని చూసేందుకు సందర్శకులు ఆసక్తి చూపుతున్నారు. పూర్తిగా బంగారు పూతతో మెరిసిపోతున్న ఈ శిల్పం, ట్రంప్‌పై ఒక వ్యంగ్యాస్త్రంగా నిలుస్తోంది.
డెన్మార్క్‌కు చెందిన ప్రముఖ శిల్పి జెన్స్ గాల్‌షియోట్ ఈ విగ్రహాన్ని రూపొందించారు. సుమారు 8.5 అడుగుల (2.6 మీటర్లు) ఎత్తు ఉన్న ఈ రాగి శిల్పానికి 23 క్యారెట్ల బంగారు పూత పూశారు. ఈ విగ్రహంలో ట్రంప్ నగ్నంగా, బలహీనంగా ఉన్న ఒక వ్యక్తి భుజాలపై కూర్చుని ఉంటారు.
ఆయన ఒక చేతిలో గోల్ఫ్ క్లబ్, మరో చేతిలో న్యాయదేవత పట్టుకునే త్రాసును పట్టుకుని కనిపిస్తారు. ఈ శిల్పాన్ని ‘కింగ్ ఆఫ్ ఇన్‌జస్టిస్’ (అన్యాయానికి రాజు) అని కూడా పిలుస్తున్నారు. ఈ విగ్రహం పీఠంపై ఒక ఆసక్తికరమైన సందేశం రాసి ఉంది.
“నేను ఒక వ్యక్తి వీపుపై కూర్చున్నాను. నా బరువుతో అతను కుంగిపోతున్నాడు. అతనికి సహాయం చేయడానికి నేను ఏదైనా చేస్తాను.. కానీ అతని వీపు పైనుంచి దిగడం తప్ప” అనే వాక్యాలు ఈ శిల్పం ఉద్దేశాన్ని స్పష్టం చేస్తున్నాయి. ఇది ఒక రాజకీయ వ్యంగ్యాస్త్రమని శిల్పి గాల్‌షియోట్ వివరించారు.
డానిష్ ఎంఈపీ పెర్ క్లాసెన్ ఆధ్వర్యంలో ఏర్పాటు చేసిన ఒక చిన్న ప్రదర్శనలో ఈ విగ్రహాన్ని ప్రధాన ఆకర్షణగా నిలిపారు. పార్లమెంట్‌లోని విన్‌స్టన్ చర్చిల్ భవనంలో ఈ ప్రదర్శన జరుగుతోంది. సందర్శకుల కోసం ఈ విగ్రహం చిన్న ప్రతిరూపాలను కూడా పంపిణీ చేశారు.
కొన్ని రోజుల ప్రదర్శన తర్వాత ఈ శిల్పాన్ని ఇక్కడి నుంచి తొలగించనున్నారు. కాగా, శిల్పి గాల్‌షియోట్ గతంలో కూడా పలు అంతర్జాతీయ వేదికలపై ఇలాంటి వివాదాస్పద కళాఖండాలను ప్రదర్శనకు ఉంచారు
