జగిత్యాల, సెప్టెంబర్ 27 (Y7 న్యూస్): జగిత్యాల జిల్లా మెట్పల్లిలో అవినీతి నిరోధక శాఖ (ఏసీబీ) అధికారులు నిర్వహించిన దాడిలో సీడీపీవో (చైల్డ్ డెవలప్మెంట్ ప్రాజెక్ట్ ఆఫీసర్) పద్మ లంచం తీసుకుంటూ పట్టుబడ్డారు. అంగన్వాడీ కేంద్రాల తనిఖీల్లో ప్రతికూల వ్యాఖ్యలు నమోదు చేయకుండా అనుకూలంగా వ్యవహరించేందుకు లంచం డిమాండ్ చేసినట్లు ఏసీబీ అధికారులు వెల్లడించారు.
ఏసీబీ తెలిపిన వివరాల ప్రకారం, మెట్పల్లి పట్టణ సెక్టార్ పరిధిలోని 21 అంగన్వాడీ కేంద్రాల తనిఖీల సందర్భంగా ప్రతికూల నివేదికలు నమోదు చేయకుండా ఉండేందుకు ఒక్కో కేంద్రం నుంచి నెలకు రూ.1,000 చొప్పున మూడు నెలలకు రూ.3,000 చొప్పున మొత్తం రూ.63,000 లంచం డిమాండ్ చేసినట్లు ఆరోపణలు ఉన్నాయి.
ఈ విషయమై అందిన ఫిర్యాదు మేరకు ఏసీబీ అధికారులు ఉచ్చు పన్ని, సెప్టెంబర్ 26న ఫిర్యాదుదారుడి నుంచి రూ.63,000 లంచం స్వీకరిస్తుండగా మెట్పల్లిలోని ఆమె కార్యాలయ ఆవరణ వెలుపల రెడ్ హ్యాండెడ్గా పట్టుకున్నారు. అనంతరం ఆమె వద్ద నుంచి లంచం సొమ్మును స్వాధీనం చేసుకున్నారు.
సీడీపీవో పద్మను అరెస్ట్ చేసిన ఏసీబీ అధికారులు, కరీంనగర్లోని ఎస్పీఈ-ఏసీబీ కేసుల ప్రత్యేక న్యాయస్థానంలో హాజరుపరచి జ్యుడీషియల్ రిమాండ్కు తరలించనున్నట్లు తెలిపారు. ఈ ఘటన జిల్లాలో చర్చనీయాంశంగా మారింది.
