స్మార్ట్ఫోన్ డిస్ప్లే డిజైన్లో మరో కొత్త ప్రయోగానికి టెక్నో సిద్ధమైంది. స్క్రీన్ చుట్టూ సాధారణంగా కనిపించే బెజెల్స్ను పూర్తిగా తొలగించి, 0mm డిస్ప్లే బోర్డర్తో కొత్త కాన్సెప్ట్ స్మార్ట్ఫోన్ను కంపెనీ పరిచయం చేయనుంది. నెక్స్ట్-జెన్ బెజెల్లెస్ కాన్సెప్ట్ ఫోన్ను IFA 2026లో ప్రదర్శించనున్నట్లు టెక్నో అధికారికంగా ప్రకటించింది.
టెక్నో వెల్లడించిన వివరాల ప్రకారం.. ఈ కాన్సెప్ట్ ఫోన్లో డిస్ప్లే, ఫ్రేమ్ మధ్య కనిపించే నల్లటి బోర్డర్ను పూర్తిగా తొలగించారు. ఇందుకోసం అడ్వాన్స్డ్ ఇంటర్నల్ స్టాకింగ్, కొత్త స్క్రీన్ ప్యాకేజింగ్ టెక్నిక్స్, స్ట్రక్చరల్ రీ-ఇంజనీరింగ్ వంటి అధునాతన సాంకేతికతలను ఉపయోగించినట్లు కంపెనీ తెలిపింది. దీంతో ఫోన్ ముందు భాగం దాదాపు మొత్తం డిస్ప్లేతోనే కనిపించే అవకాశం ఉంది.
మరోవైపు ప్రముఖ టిప్స్టర్ ఐస్ యూనివర్స్ కూడా ఈ కాన్సెప్ట్ ఫోన్కు సంబంధించిన చిత్రాలను సోషల్ మీడియాలో షేర్ చేశారు. నిజమైన 0mm డిస్ప్లే బోర్డర్తో వస్తున్న పరిశ్రమలోనే తొలి స్మార్ట్ఫోన్ కాన్సెప్ట్గా దీనిని ఆయన అభివర్ణించారు. అయితే ఇది ప్రస్తుతం కాన్సెప్ట్ ఫోన్ మాత్రమే కావడంతో.. ఈ టెక్నాలజీని భవిష్యత్ కమర్షియల్ స్మార్ట్ఫోన్లలో టెక్నో ఎలా అమలు చేస్తుందనే దానిపై ఆసక్తి నెలకొంది.
