వాయువ్య జర్మనీలోని ఓల్డెన్బర్గ్ సమీపంలోని గాండర్క్సీ ప్రాంతంలో శనివారం విషాదకర విమాన ప్రమాదం చోటుచేసుకుంది. ఓ చిన్న ప్రైవేట్ విమానం అకస్మాత్తుగా నియంత్రణ కోల్పోయి నివాస ప్రాంతంలోని ఇంటి పైకప్పుపై కూలిపోయింది. ప్రమాదం జరిగిన వెంటనే అత్యవసర సిబ్బంది సంఘటనా స్థలానికి చేరుకుని సహాయక చర్యలు చేపట్టారు.
పోలీసుల వివరాల ప్రకారం, విమానంలో ప్రయాణిస్తున్న ఇద్దరూ బ్రెమెన్కు చెందినవారు. వారి వయస్సులు 65, 77 సంవత్సరాలు. తొలుత ఒకరు మృతిచెందగా, మరొకరు కనిపించకుండా పోయారు. అనంతరం శిథిలాలను తొలగించి గాలింపు చేపట్టగా రెండో వ్యక్తి మృతదేహాన్ని కూడా గుర్తించారు. ఈ ప్రమాదంలో ఇంట్లో ఉన్న వారికి ఎలాంటి గాయాలు కాలేదని అధికారులు వెల్లడించారు.
ఈ ప్రమాదానికి గల ఖచ్చితమైన కారణాలు ఇంకా తెలియరాలేదు. విమానం ఎందుకు అదుపు తప్పిందనే అంశంపై జర్మన్ విమానయాన దర్యాప్తు అధికారులు అన్ని కోణాల్లో విచారణ చేపట్టారు. ఘటనకు సంబంధించిన పూర్తి వివరాలను సేకరిస్తూ ప్రమాదానికి దారితీసిన పరిస్థితులను పరిశీలిస్తున్నారు.
