రక్తపోటు (బ్లడ్ ప్రెజర్) రీడింగ్లో కనిపించే రెండు సంఖ్యలు గుండె ఆరోగ్యానికి సంబంధించిన ముఖ్యమైన సమాచారాన్ని ఇస్తాయి. పై సంఖ్య (సిస్టోలిక్) గుండె రక్తాన్ని పంపేటప్పుడు రక్తనాళాలపై పడే ఒత్తిడిని సూచిస్తే, కింది సంఖ్య (డయాస్టోలిక్) గుండె విశ్రాంతి తీసుకునే సమయంలో ఉండే ఒత్తిడిని సూచిస్తుంది.
వైద్యుల ప్రకారం 118/76 బీపీ సాధారణ స్థాయిగా పరిగణించవచ్చు. ఈ స్థాయిలో రక్తనాళాలపై ఒత్తిడి తక్కువగా ఉండి, గుండెపై అదనపు భారం ఉండదు. 136/88 రీడింగ్ వచ్చినప్పుడు జాగ్రత్తలు ప్రారంభించాల్సిన సమయం. నిద్ర, ఒత్తిడి, మద్యం సేవించడం, శరీర బరువు, వ్యాయామం వంటి జీవనశైలి అంశాలను పరిశీలించి మార్పులు చేసుకోవడం మంచిది.
148/92 స్థాయికి చేరుకుంటే రక్తనాళాలపై ప్రభావం ప్రారంభమయ్యే అవకాశం ఉంది. దీర్ఘకాలంలో రక్తనాళాలు గట్టిపడటం, కొవ్వు పేరుకుపోవడం, గుండెపై ఒత్తిడి పెరగడం వంటి సమస్యల ప్రమాదం పెరుగుతుంది. 162/100 రీడింగ్ వస్తే నిర్లక్ష్యం చేయకూడదు. ఈ స్థాయిలో గుండెపోటు, పక్షవాతం (స్ట్రోక్), మూత్రపిండాల వ్యాధుల ప్రమాదం గణనీయంగా పెరిగే అవకాశం ఉందని వైద్యులు హెచ్చరిస్తున్నారు.
అయితే ఒక్కసారి బీపీ కొలిచిన రీడింగ్ ఆధారంగా తుది నిర్ణయం తీసుకోకూడదు. రోజంతా బీపీ మారుతూ ఉండటం సహజం. అందుకే కొన్ని రోజుల పాటు ఉదయం, సాయంత్రం ఒకే సమయానికి బీపీని కొలిచి, వచ్చిన రీడింగ్స్ సగటును పరిశీలించడం మంచిది. మీ బీపీ తరచూ ఎక్కువగా వస్తే లేదా ఆరోగ్య సమస్యలు ఉంటే తప్పనిసరిగా వైద్యుడిని సంప్రదించాలి.
ఈ సమాచారం అవగాహన కోసం మాత్రమే; ఇది వైద్య సలహాకు ప్రత్యామ్నాయం కాదు.
