ఫీచర్ ఫోన్లకు ఇప్పటికీ మంచి డిమాండ్ ఉన్న నేపథ్యంలో HMD మరో కొత్త నోకియా ఫోన్ను మార్కెట్లోకి తీసుకొచ్చింది. కంపెనీ Nokia 123 Shield పేరుతో కొత్త ఫీచర్ ఫోన్ను ఆవిష్కరించింది. తక్కువ ధరలో నమ్మకమైన బ్యాకప్ ఫోన్ కోసం చూస్తున్నవారితో పాటు, బయట ఎక్కువ సమయం పనిచేసే వినియోగదారులను దృష్టిలో ఉంచుకుని ఈ ఫోన్ను రూపొందించినట్లు కంపెనీ తెలిపింది.
ఈ ఫోన్లోని ప్రధాన ఆకర్షణ నీరు, ధూళి నుంచి రక్షణ కలిగిన బలమైన డిజైన్. అలాగే ఒకసారి ఛార్జ్ చేస్తే 19 రోజుల వరకు స్టాండ్బై బ్యాటరీ బ్యాకప్ అందుతుందని కంపెనీ పేర్కొంది. దీంతో దీర్ఘకాలిక బ్యాటరీ లైఫ్ కోరుకునే వినియోగదారులకు ఇది మంచి ఎంపికగా మారే అవకాశం ఉంది.
HMD ఇంకా Nokia 123 Shield అధికారిక గ్లోబల్ ధరను ప్రకటించలేదు. అయితే బల్గేరియా మరియు గ్రీస్ దేశాల్లోని రిటైల్ లిస్టింగ్ల ప్రకారం ఈ ఫోన్ ధర 35-40 యూరోల మధ్య ఉండే అవకాశం ఉంది. భారత కరెన్సీలో ఇది సుమారు రూ.3,500 నుంచి రూ.4,000 వరకు ఉండొచ్చని అంచనా వేస్తున్నారు.
