దుమ్ముగూడెం, జూలై 22 (వై7 న్యూస్):నీట్ (NEET) పరీక్ష పేపర్ లీక్ ఆరోపణలు దేశవ్యాప్తంగా లక్షలాది మంది విద్యార్థులు, యువతలో తీవ్ర ఆందోళనకు కారణమయ్యాయని దుమ్ముగూడెం మండల కాంగ్రెస్ కమిటీ పేర్కొంది. విద్యార్థుల భవిష్యత్తుతో ముడిపడి ఉన్న ఈ కీలక అంశంలో కేంద్ర ప్రభుత్వం పూర్తిగా విఫలమైందని కాంగ్రెస్ నాయకులు విమర్శించారు.
ఈ నేపథ్యంలో కాంగ్రెస్ అగ్రనేత, లోక్సభ ప్రతిపక్ష నాయకుడు రాహుల్ గాంధీ, కాంగ్రెస్ ప్రధాన కార్యదర్శి ప్రియాంక గాంధీ వాద్రా నాయకత్వంలో నిర్వహించిన శాంతియుత నిరసన కార్యక్రమానికి మద్దతుగా దుమ్ముగూడెం మండల కాంగ్రెస్ ఆధ్వర్యంలో ములకపాడులో నిరసన చేపట్టారు.
రాజ్యాంగ నిర్మాత డాక్టర్ బి.ఆర్. అంబేద్కర్ విగ్రహం వద్ద నల్లజెండాలతో, కేంద్ర ప్రభుత్వానికి వ్యతిరేకంగా నినాదాలు చేస్తూ నిరసన తెలిపారు. కేంద్ర విద్యాశాఖ మంత్రి ధర్మేంద్ర ప్రధాన్ నైతిక బాధ్యత వహిస్తూ వెంటనే రాజీనామా చేయాలని డిమాండ్ చేశారు.
అనంతరం జరిగిన సమావేశంలో జిల్లా కాంగ్రెస్ కార్యదర్శి లంకా శ్రీనివాసరావు మాట్లాడుతూ, నీట్ పేపర్ లీక్ వ్యవహారంపై పూర్తిస్థాయి, పారదర్శక విచారణ జరిపి, బాధ్యులపై కఠిన చర్యలు తీసుకోవాలని కేంద్ర ప్రభుత్వాన్ని కోరారు. విద్యార్థుల్లో కోల్పోయిన విశ్వాసాన్ని పునరుద్ధరించడం ప్రభుత్వ బాధ్యత అని అన్నారు.
ప్రజాస్వామ్య దేశంలో శాంతియుత నిరసన ప్రతి పౌరుడి రాజ్యాంగబద్ధ హక్కు అని పేర్కొన్న నాయకులు, నిరసన కార్యక్రమాలపై లాఠీచార్జ్లు, అరెస్టులు చేయడం ప్రజాస్వామ్య విలువలకు విరుద్ధమని విమర్శించారు.
విద్యార్థుల భవిష్యత్తును రాజకీయాలకు అతీతంగా పరిరక్షించడం ప్రతి ప్రభుత్వ బాధ్యత అని, కాంగ్రెస్ పార్టీ ఎల్లప్పుడూ విద్యార్థులు, యువత హక్కుల పరిరక్షణ కోసం పోరాడుతుందని నాయకులు తెలిపారు.
ఈ కార్యక్రమంలో సీనియర్ నాయకులు బైరెడ్డి సీతారామారావు, మోటుపల్లి నటరాజస్వామి, దర్శి సాంబశివరావు, కంగాల వెంకటేష్, కనుబుద్ది దేవ, సిద్ది ప్రవీణ్, కెల్లా శేఖర్, గడ్డం బాలాజీ, జీరి సత్యనారాయణ రెడ్డి, లంకా ప్రసాద్, సందీప్ రెడ్డి, సోడి సందేశ్వరావు, కుంజా మల్లేష్, పాయం రాంబాబు, సత్తిబాబు, యడ్ల శంకర్, నీలంబాబు, వెంకటేష్ తదితరులు పాల్గొన్నారు.
