పలాస, జూన్ 20 (వై7 న్యూస్): శ్రీకాకుళం జిల్లా పలాసలో కాశీబుగ్గ పోలీసులు నిర్వహించిన ప్రత్యేక తనిఖీల్లో అంతర్రాష్ట్ర గంజాయి రవాణా ముఠా గుట్టు రట్టైంది. ఈ ఆపరేషన్లో 5.160 కిలోల గంజాయిని స్వాధీనం చేసుకుని వెస్ట్ బెంగాల్కు చెందిన ఓ వ్యక్తిని అరెస్ట్ చేశారు. మరో ఇద్దరు నిందితులు పరారీలో ఉండటంతో వారి కోసం ప్రత్యేక బృందాలు గాలింపు చర్యలు చేపట్టాయి.
పోలీసుల కథనం ప్రకారం, ఒడిశా, గోవా, వెస్ట్ బెంగాల్ రాష్ట్రాలకు చెందిన వ్యక్తులు కలిసి గంజాయి అక్రమ రవాణాకు పాల్పడుతున్నట్లు విశ్వసనీయ సమాచారం అందడంతో కాశీబుగ్గ పోలీసులు నిఘా పెంచారు. ఈ క్రమంలో పలాస రైల్వే కాలనీ పరిసర ప్రాంతాల్లో అనుమానాస్పదంగా సంచరిస్తున్న వ్యక్తిని అదుపులోకి తీసుకుని తనిఖీ చేయగా, అతని వద్ద నుంచి 5.160 కిలోల గంజాయి లభ్యమైంది.
పట్టుబడిన వ్యక్తిని వెస్ట్ బెంగాల్కు చెందిన మహ్మద్ ముస్తాక్ ఆలమ్ అలియాస్ బంటిగా గుర్తించారు. అతడిని అరెస్ట్ చేసి విచారించగా, ఒడిశాకు చెందిన ఓమ్ నాయక్, గోవాకు చెందిన సుమీత్ అలియాస్ విక్కీలతో కలిసి గంజాయి రవాణా చేస్తున్నట్లు వెల్లడైంది. అయితే మిగిలిన ఇద్దరు నిందితులు పరారీలో ఉండటంతో వారి కోసం పోలీసులు గాలిస్తున్నారు.
ప్రాథమిక విచారణలో ఒడిశా అటవీ ప్రాంతాల్లో సేకరించిన గంజాయిని గోవాకు తరలించే ప్రయత్నంలో ఈ ముఠా ఉన్నట్లు పోలీసులు గుర్తించారు. అలాగే పలాస రైల్వే మార్గాన్ని అక్రమ రవాణాకు వినియోగిస్తున్నారనే కోణంలో కూడా దర్యాప్తు కొనసాగుతోంది.
ఈ సందర్భంగా కాశీబుగ్గ సర్కిల్ ఇన్స్పెక్టర్ రామకృష్ణ మాట్లాడుతూ, మాదకద్రవ్యాల అక్రమ రవాణాపై పోలీసు శాఖ కఠినంగా వ్యవహరిస్తోందన్నారు. యువతను మత్తు పదార్థాల బారిన పడకుండా కాపాడేందుకు ప్రత్యేక చర్యలు తీసుకుంటున్నామని తెలిపారు. పరారీలో ఉన్న నిందితులను త్వరలోనే పట్టుకుంటామని, గంజాయి సరఫరా నెట్వర్క్పై సమగ్ర విచారణ కొనసాగుతోందని వెల్లడించారు.
ఈ ఆపరేషన్లో ఎస్సై సునీల్, ఏఎస్సై భాస్కరరావు తదితర పోలీసు సిబ్బంది పాల్గొన్నారు.
