కేంద్ర ప్రభుత్వంలో కీలక పరిణామం చోటుచేసుకుంది. కేంద్ర సమాచార, ప్రసార, పార్లమెంటరీ వ్యవహారాల శాఖ సహాయ మంత్రి ఎల్. మురుగన్ తన పదవులకు రాజీనామా చేశారు. కేంద్ర మంత్రి పదవితో పాటు, తన రాజ్యసభ సభ్యత్వానికి కూడా ఆయన మంగళవారం రాజీనామా సమర్పించారు. తమిళనాడులో బీజేపీని క్షేత్రస్థాయిలో బలోపేతం చేయడం, 2029 లోక్‌సభ ఎన్నికల నాటికి పార్టీని సమాయత్తం చేయడమే లక్ష్యంగా ఈ నిర్ణయం తీసుకున్నట్లు ఆయన స్పష్టం చేశారు.
ఈ మేరకు ప్రధానమంత్రి నరేంద్ర మోదీకి లేఖ రాసినట్లు మురుగన్ వెల్లడించారు. “తమిళనాడుకు వెళ్లి పార్టీ కోసం పూర్తిస్థాయిలో పనిచేయాలన్న నా ఆకాంక్షను ప్రధాని మోదీకి లేఖ ద్వారా తెలియజేశాను. మంత్రిగా నా బాధ్యతల నుంచి, రాజ్యసభ సభ్యత్వం నుంచి నన్ను విముక్తుడిని చేయాలని కోరాను” అని ఆయన వివరించారు. ఇటీవల ప్రధాని మోదీ తమిళనాడు పర్యటనకు వచ్చినప్పుడు ప్రజల నుంచి లభించిన అపూర్వ ఆదరణ, ఉత్సాహం చూశాక తన నిర్ణయం మరింత బలపడిందని ఆయన పేర్కొన్నారు.
తమిళనాడులోని ప్రతి గ్రామం, ప్రతి వీధిలో పర్యటించి ప్రజలను, పార్టీ కార్యకర్తలను కలుస్తానని, రాష్ట్రవ్యాప్తంగా బీజేపీ ఉనికిని విస్తరింపజేస్తానని మురుగన్ తన లేఖలో పేర్కొన్నారు. 2029 లోక్‌సభ ఎన్నికల్లో తమిళనాడు నుంచి పార్టీకి మెరుగైన ఫలితాలు అందించడమే తన లక్ష్యమని ఆయన తెలిపారు. త్వరలో కేంద్ర మంత్రివర్గ పునర్‌వ్యవస్థీకరణ జరగవచ్చనే ఊహాగానాల మధ్య మురుగన్ రాజీనామా రాజకీయ ప్రాధాన్యత సంతరించుకుంది.
సాధారణ కార్యకర్తకు దక్కిన గౌరవం
ఈ సందర్భంగా గత ఐదేళ్లుగా కేంద్ర ప్రభుత్వంలో పనిచేసే అవకాశం కల్పించినందుకు ప్రధాని మోదీకి మురుగన్ కృతజ్ఞతలు తెలిపారు. తనది రాజకీయ నేపథ్యం ఉన్న కుటుంబం కాదని, తమిళనాడులోని ఓ కుగ్రామంలో నిరుపేద కుటుంబంలో జన్మించానని గుర్తు చేసుకున్నారు. తన తల్లిదండ్రులు రోజువారీ కూలీలుగా, పశువుల కాపరులుగా పనిచేశారని, అలాంటిది వారి కుమారుడిగా తాను కేంద్ర ప్రభుత్వంలో కీలక బాధ్యతలు నిర్వహిస్తానని ఎన్నడూ ఊహించలేదని అన్నారు. కళాశాల రోజుల్లోనే ఏబీవీపీలో చేరి, గత మూడు దశాబ్దాలుగా ఏబీవీపీ, బీజేపీల్లో నిబద్ధతతో పనిచేశానని తెలిపారు.
జాతీయ ఎస్సీ కమిషన్ వైస్-ఛైర్మన్‌గా, రాజ్యసభ సభ్యుడిగా తనకు దక్కిన అవకాశాలను ఆయన స్మరించుకున్నారు. 2021 జులైలో ఆయన కేంద్ర మంత్రిమండలిలో చేరారు. కాశీ తమిళ్ సంగమం, పార్లమెంటులో సెంగోల్ ఏర్పాటు వంటి కార్యక్రమాలతో తమిళ వారసత్వానికి కేంద్ర ప్రభుత్వం గొప్ప గుర్తింపునిచ్చిందని కొనియాడారు. ‘సబ్ కా సాథ్, సబ్ కా వికాస్, సబ్ కా విశ్వాస్’ అనే సందేశాన్ని తమిళనాడు ప్రజల్లోకి తీసుకెళ్లి, పార్టీని మరింత పటిష్ఠం చేస్తానని మురుగన్ ధీమా వ్యక్తం చేశారు.
