ఆర్ఎంపీపై ఫిర్యాదు.. విచారణకు దిగిన వైద్య ఆరోగ్యశాఖ అధికారులు
అశ్వాపురం, సెప్టెంబర్ 27:
అశ్వాపురం మండలంలో ఆర్ఎంపీ వైద్యంపై వచ్చిన ఫిర్యాదుపై వైద్య ఆరోగ్యశాఖ అధికారులు విచారణ చేపట్టారు. ఓ రోగికి మోతాదుకు మించి మందులు, వైద్యం అందించడంతో ఆరోగ్య పరిస్థితి దెబ్బతిన్నట్లు రోగి కుటుంబ సభ్యులు ఆరోపించిన నేపథ్యంలో అధికారులు స్పందించారు.
ఫిర్యాదుపై భద్రాచలం డిప్యూటీ డీఎంహెచ్ఓ శ్రీధర్ సంబంధిత ఆర్ఎంపీ నిర్వాహకుడిని విచారించినట్లు సమాచారం. రోగికి అందించిన చికిత్స, ఉపయోగించిన మందులు, వాటి మోతాదు, చికిత్సకు సంబంధించిన ఇతర వివరాలను అధికారులు పరిశీలించినట్లు తెలిసింది.
నిబంధనలకు విరుద్ధంగా వైద్యం అందించారా? రోగికి అధిక మోతాదులో మందులు వినియోగించారా? అనే అంశాలపై అధికారులు ఆరా తీస్తున్నట్లు సమాచారం. అయితే విచారణ పూర్తయ్యే వరకు ఆరోపణలు వాస్తవమని నిర్ధారించలేమని అధికారులు పేర్కొంటున్నారు.
విచారణలో నిబంధనలకు విరుద్ధంగా వైద్యం అందించినట్లు తేలితే సంబంధిత వ్యక్తిపై నిబంధనల ప్రకారం చర్యలు తీసుకునే అవకాశం ఉన్నట్లు వైద్య ఆరోగ్యశాఖ వర్గాల ద్వారా తెలుస్తోంది. పూర్తి వివరాలు విచారణ అనంతరం వెల్లడికానున్నాయి.
