ప్రజలకు ఇబ్బందులు కలగకుండా అధికారులకు ఆదేశాలు
పలాస: శ్రీకాకుళం జిల్లా పలాస–కాశీబుగ్గ మున్సిపాలిటీ పరిధిలో కురుస్తున్న భారీ వర్షాల నేపథ్యంలో స్థానిక ప్రజలకు ఎలాంటి ఇబ్బందులు తలెత్తకుండా ముందస్తు చర్యలు చేపట్టాలని ప్రజాప్రతినిధి అధికారులను ఆదేశించారు. మంగళవారం ఆకస్మికంగా పలాస–కాశీబుగ్గ పట్టణంలోని పలు ప్రాంతాలను పరిశీలించి పరిస్థితిని సమీక్షించారు.
ఈ సందర్భంగా దేశబట్టి చెరువు–కాలువ ప్రాంతాన్ని సందర్శించి, రైల్వే పనుల కారణంగా నీటి ప్రవాహానికి ఆటంకం ఏర్పడిన విషయాన్ని గమనించారు. వెంటనే సంబంధిత రైల్వే అధికారులను సంఘటనా స్థలానికి పిలిపించి, కాలువలో నీరు సాఫీగా ప్రవహించేలా తక్షణ చర్యలు చేపట్టాలని ఆదేశించారు.
అనంతరం 3 రోడ్ల జంక్షన్ వద్ద డ్రైనేజీ వ్యవస్థను పరిశీలించారు. వర్షపు నీరు నిలిచిపోకుండా డ్రైనేజీ కాలువలను వెంటనే శుభ్రపరచి నీటి పారుదల సక్రమంగా జరిగేలా చూడాలని మున్సిపల్ అధికారులకు సూచించారు.
లోతట్టు ప్రాంతాలపై ప్రత్యేక దృష్టి సారించాలని, వర్షపు నీరు నిలిచే ప్రాంతాలను ముందుగానే గుర్తించి అవసరమైన చర్యలు చేపట్టాలని అధికారులను ఆదేశించారు. ప్రజల భద్రతే ప్రభుత్వానికి తొలి ప్రాధాన్యత అని పేర్కొంటూ, వర్షాల ప్రభావం పూర్తిగా తగ్గే వరకు అధికారులు క్షేత్రస్థాయిలో అందుబాటులో ఉండి పరిస్థితిని నిరంతరం పర్యవేక్షించాలని స్పష్టం చేశారు.
