యూనిఫైడ్ పేమెంట్స్ ఇంటర్ఫేస్ (యూపీఐ) లావాదేవీలను మరికొంత కాలం పాటు ఉచితంగానే కొనసాగించాలని నీతి ఆయోగ్ మాజీ వైస్ ఛైర్మన్ రాజీవ్ కుమార్ ప్రభుత్వానికి సూచించారు. రూ.2,000కు మించిన మర్చంట్ యూపీఐ లావాదేవీలపై మర్చంట్ డిస్కౌంట్ రేట్ (ఎండీఆర్) విధించాలన్న ఇటీవలి నిర్ణయంపై ఆయన స్పందించారు.
ఈ సందర్భంగా రాజీవ్ కుమార్ పలు కీలక అంశాలను వెల్లడించారు. యూపీఐ వ్యవస్థ నిర్వహణకు ఏటా సుమారు రూ.20,000 కోట్ల మేర వ్యయమవుతున్న మాట వాస్తవమే అయినప్పటికీ, డిజిటల్ ఆర్థిక వ్యవస్థ ద్వారా దేశానికి లభించే ప్రయోజనాలు ఆ ఖర్చు కంటే చాలా ఎక్కువని ఆయన అభిప్రాయపడ్డారు. ఆర్థిక వ్యవస్థలో నగదు వినియోగం గణనీయంగా తగ్గే వరకు యూపీఐ సేవలను ఉచితంగానే ఉంచడం శ్రేయస్కరమని ఆయన స్పష్టం చేశారు.
చిన్న వ్యాపారులు, వర్తకులపై 0.4 శాతం మేర ఛార్జీలు విధిస్తే, వారిలో చాలామంది తిరిగి నగదు లావాదేవీల వైపు మళ్లే ప్రమాదం ఉందని ఆయన హెచ్చరించారు. ఇది డిజిటల్ చెల్లింపుల లక్ష్యానికి విఘాతం కలిగిస్తుందని పేర్కొన్నారు. యూపీఐ సేవలను ఉచితంగా కొనసాగించడం, అధిక విలువ కలిగిన లావాదేవీలపై ఛార్జీలు విధించడంపై దేశవ్యాప్తంగా చర్చ జరుగుతున్న నేపథ్యంలో రాజీవ్ కుమార్ వ్యాఖ్యలు ప్రాధాన్యత సంతరించుకున్నాయి.
