కార్డియాక్ అరెస్ట్ అంటే కేవలం గుండెకు సంబంధించిన అత్యవసర పరిస్థితి మాత్రమే కాదు.. ఇది మెదడుపై కూడా తీవ్ర ప్రభావం చూపించే ప్రమాదకర పరిస్థితి. గుండె అకస్మాత్తుగా రక్తాన్ని పంప్ చేయడం ఆపివేస్తే, మెదడుకు అవసరమైన ఆక్సిజన్తో కూడిన రక్తప్రసరణ కూడా నిలిచిపోతుంది. దీంతో కొన్ని సెకన్లలోనే బాధితుడు స్పృహ కోల్పోయే అవకాశం ఉంటుంది.
సీనియర్ కార్డియాలజిస్టుల వివరాల ప్రకారం.. గుండె సమర్థవంతంగా కొట్టుకోవడం ఆగిన వెంటనే మెదడుకు రక్తప్రసరణ తగ్గిపోతుంది. మెదడు నిరంతరం ఆక్సిజన్పై ఆధారపడటంతో, ఆక్సిజన్ సరఫరా నిలిచిపోతే దాని పనితీరు చాలా వేగంగా దెబ్బతినే అవకాశం ఉంటుంది. ముఖ్యంగా కార్డియాక్ అరెస్ట్ సమయంలో తక్షణ వైద్య సహాయం అందకపోతే మెదడు కణాలకు నష్టం కలిగే ప్రమాదం పెరుగుతుంది.
అయితే మెదడు నష్టం సంభవించే సమయం ప్రతి వ్యక్తిలో ఒకేలా ఉండదని నిపుణులు చెబుతున్నారు. కార్డియాక్ అరెస్ట్కు కారణం, వ్యక్తి ఆరోగ్య పరిస్థితి, రక్తప్రసరణ ఎంతకాలం నిలిచిపోయింది వంటి పలు అంశాలు దీనిపై ప్రభావం చూపుతాయి. అందుకే కార్డియాక్ అరెస్ట్ సంభవించినప్పుడు వెంటనే అత్యవసర వైద్య సహాయం అందించడం అత్యంత కీలకమని నిపుణులు సూచిస్తున్నారు.
