ఉక్రెయిన్తో కొనసాగుతున్న సుదీర్ఘ యుద్ధంలో రష్యాకు ఉత్తర కొరియా మద్దతు మరింత పెంచుతున్నట్లు తెలుస్తోంది. ఇప్పటికే ఆయుధాలు, సైనికులను రష్యాకు పంపిన పియాంగ్యాంగ్.. తాజాగా మరింత కీలకమైన సైనిక సహకారాన్ని అందిస్తున్నట్లు ఉక్రెయిన్ మిలిటరీ ఇంటెలిజెన్స్ సంస్థ వెల్లడించింది. రష్యాలోని పశ్చిమ సరిహద్దు ప్రాంతాల్లో ఉత్తర కొరియాకు చెందిన ప్రత్యేక క్షిపణి విభాగాన్ని మోహరించినట్లు పేర్కొంది.
యుద్ధంలో రష్యా బలగాలకు మద్దతుగా ఉత్తర కొరియా గతంలోనే భారీగా ఆయుధాలు, మందుగుండు సామగ్రిని సరఫరా చేసినట్లు పలు నివేదికలు వెల్లడించాయి. అంతేకాకుండా వేలాది మంది ఉత్తర కొరియా సైనికులు రష్యా తరఫున యుద్ధంలో పాల్గొంటున్నట్లు సమాచారం. దీంతో ఇరు దేశాల మధ్య సైనిక సహకారం మరింత బలపడుతున్న సంకేతాలు కనిపిస్తున్నాయి.
తాజాగా క్షిపణి విభాగాన్ని రంగంలోకి దించినట్లు వచ్చిన సమాచారం అంతర్జాతీయంగా ప్రాధాన్యం సంతరించుకుంది. ఈ పరిణామం రష్యా-ఉత్తర కొరియా మధ్య పెరుగుతున్న రక్షణ సంబంధాలకు మరో ఉదాహరణగా విశ్లేషకులు భావిస్తున్నారు. అయితే క్షిపణి విభాగం మోహరింపు, దాని కార్యకలాపాలకు సంబంధించిన పూర్తి వివరాలపై స్వతంత్ర ధృవీకరణ ఇంకా అందాల్సి ఉంది.
